© 2006 - 2017 «Из глубины воззвах к тебе» | редактор сайта – епископ Игнатий (Душеин)
На утрени
Тропарь, глас 4:
Тебе дарова Бог ведети тайны Царствия Небесного, /еже есть Церковь Сына Его, / да возможеши утвердити колеблемыя в вере, /и от Церкве Христовой отпадшия паки на путь спасения возвратити, /темже молим тя священномучениче Михаиле, / сподоби и нас, ко Христу твоими молитвами, /в Церкви Его даже до конца пребыти покаянием.
По 1-м стихословии седален, глас 4:
Страдания лютая доблественне претерпевая, мучениче Михаиле,/ евангельския заповеди соблюл еси/ и, яко добрый и верный раб, в радость Господа твоего вшел еси,/ Иже воздаде ти по правде твоей/ и яви людем Российским споборника необорима.
Слава, и ныне, Богородичен:
Стена необоримая верным и мучеником похвала Ты еси, Богородице Дево,/ к Тебе бо прибегающе, невредими пребываем и Усердную Молитвенницу имамы./ Тем, благодаряще, вопием Ти:/ радуйся, Благодатная, Господь с Тобою.
Величание:
Величаем тя,/ святый мучениче Михаиле,/ и чтем честная страдания твоя,/ яже за Христа// претерпел еси.
По полиелеи седален, глас 4:
Скорби, узы и страдания за Христа от безбожных и лжебратий претерпев на земли, мучениче Михаиле,/ ныне жизни вечныя радостне у Престола Божия наслаждаешися/ и молишися непрестанно о душах наших.
Слава, и ныне, Богородичен:
Непоколебимое Утверждение веры/ и присное Прибежище душ наших,/ Богородицу песньми величаем, вернии:/ радуйся, Православия Ограждение,/ радуйся, верным Покрове,/ радуйся, Невесто Неневестная.
Степенна, 1-й антифон 4-го гласа.
Прокимен, глас 4: Господи, Тебе ради умерщвляеми есмы весь день. Стих: Вменихомся, яко овцы заколения.
Всякое дыхание: Евангелие от Луки, зачало 63.
По 50-м псалме стихира, глас 6:
К Богу Вышнему Живому/ воззвал еси, мучениче добропобедне Михаиле:/ помилуй мя, Господи,/ яко врази нечестивии попирают мя./ Той же избави душу твою от смерти,/ очи от слез и нозе от поползновения,/ и со святыми Земли Российския// во свете живых прослави тя.
Канон, глас 5:
Ирмос: Коня и всадника в море Чермное,/ сокрушаяй брани мышцею высокою,/ Христос истрясе,/ Израиля же спасе,/ победную песнь поюща.
Приими малое пение сие от нас, / от сердца приносимое тебе, /и настави люди твоя / пети тя и Бога славити истинно, / мучениче Михаиле.
От юности истинныя Премудрости взыскал еси Михаиле,/ и на пути сем претыкался еси, врагом лукавым прельщаем/ но милостию Человеколюбца на путь правый управлен был еси.
Егда познал еси Христа – Божию Премудрость и Силу Михаиле любомудре/ тогда никакоже обратился еси вспять/ но Египет мысленный оплевав/ в землю обетованную – Церковь Христову,/ яже новый Израиль устремился еси.
Слава: За веру забытую и попранную/ якоже Илия огнеколесничник ревностно подвизался еси,/ и якоже оный во времена тихия гоним был еси,/ поя Богу: Свят еси Господи!
И ныне: Благословенная и Благодатная Богородица/ верным радость породила еси, — Христа, Спасение мира/ сим и нас недостойных сочисли.
Ирмос: Водрузивый на ничесомже землю повелением Твоим,/ и повесивый неодержимо тяготеющую,/ на недвижимем, Христе, камени заповедей Твоих,/ Церковь Твою утверди, / едине, Блаже и Человеколюбче.
Народ Божий просвещати не преставал еси/ творения древних подвижников яко мед сладкий верным принося/ и многия сим на путь спасения наставляя/ Истины проповедник и апостол явился еси Михаиле,/ новый страдальче земли нашея.
Ревностию по Бозе распаляем/ глас обличения возвысил еси Михаиле/ распутство духовное и телесное яве обличил еси/ верных укрепив зело/ и от власть предержащих еще прежде безбожных гонений пострадал еси/ мученик произволением быв.
Имя Божие прославляя, яко имя Его сам Бог есть, глаголал еси, вкупе со Иосифом святителем, Феодором исповедником и иными мноземи святители, пастыри и мирскими исповедники, сице взывая: благословен еси, Боже отец наших.
Слава: Егда беды и скорби постигоша подвизающихся за Имя Божие/ никакоже умедлил еси Михаиле боголюбче/ со Святою преподобномученицею Елисоветою абие/ праведных поддержати и нечестие имяборцев яве обличил еси.
И ныне: Естество человеческое Тобою, Пречистая, обожение восприя, Сына бо единосущного Отцу и Духу родила еси, Богородице; Его же Тело – Церковь Святая – чуждо греху и исполнено ведения пребывает, воспевая волею плотию Распятаго и человеческий род совоскресившаго Спаса.
Глад, гонения велия, лишения различная,/ скорби многия, тесноту во узах/ мужественне претерпел еси от ненавидящих Господа, страдальче Михаиле,/ и ничтоже возможе разлучити тя от любве Христовы,/ Егоже ради и смерть мученическую приял еси./ Мы же тя, яко теплаго предстателя к Нему стяжавше,/ достодолжно прославляем.
Слава, и ныне, Богородичен:
Кийждо, идеже спасается, тамо праведно и притекает,/ и кое иное прибежище, яко Ты, Богородице,/ отечества нашего Усердная Заступница.
Ирмос: Божественное Твое разумев истощание/ прозорливо Аввакум, Христе, со трепетом вопияше Тебе:/ во спасение людей Твоих/ спасти помазанныя Твоя пришел еси.
Егда праведным судом Божиим найде на землю нашу тяжкое испытание, тогда познал еси, мучениче, красная и благая мира сего не яко стояща быти, но яко текуща, на единаго Христа и на Имя Его сладчайшее упование возложил еси.
Сына Отча зов услышав, за Христом путем узким идти возжелал еси, Его же Церковь обрел еси яко стан Израилев обложен врагом. Вразуми же тя Господь ко столпу огненному стопы народа Божия и сердца иерархов направити, мучениче.
Пролитие крове христианския видя/ и слух слыша попрания святынь православных,/ сице вопиял еси:/ грех ради наших и за неверствие наше/ сие постигло нас праведным судом Божиим.
Слава: Словом огненным Слово Божие – Христа проповедал еси,/ егда мнози отступиша и смутишася,/ столп веры Святоотеческия и благочестия правило/ показался еси Михаиле страдальче.
И ныне: Богородичен: Пререкание злославных и мрак люте истязуют землю Твою, уязвихомся от змия людие Твои, и яко из адова чрева вопием Ти, Благодатная: не нам, Дево, не нам, но ради молитв заступников наших, Феодора исповедника и Михаила мученика, светильников исповедания пресветлых, спаси, Владычице, всех верных останок малый Церкви православныя.
Ирмос: Одеяйся светом, яко ризою,/ к Тебе утренюю,/ и Тебе зову:/ душу мою просвети, омраченную, Христе,/ яко един Благоутробен.
Волки мнозии и лютии из лжепастырей возсташа,/ егда безбожия реки яко волны потопа наводнили землю Российскую./ Ты же Михаиле святе непоколебим яко храмина на Камени веры утвержденная/ – Христе Иисусе – пребыл еси.
Дивное чудо видим о тебе мучениче Христов Михаиле!/ Егда мнозии от веры Христовой отступиша,/ тогда ты святе, лик богословов и ревнителей веры Святоотеческия/ труды своими умножил еси.
Слава: Шатания обновленческия и отступства малодушныя мужески обличил еси Михаиле,/ и уста лукавыя затворил еси,/ и челюсти враг Христовых мечем словес твоих сокрушил еси.
Богородичен: Покров, Заступление и Утешение в напастех и злых обстояниих Ты еси, Богородице./ Сего ради благодарственно Тя величаем.
Ирмос: Неистовствующееся бурею душетленною, Владыко Христе,/ страстей море укроти,/ и от тли возведи мя,/ яко Благоутробен.
В темницу за обличения прельщения обновленческаго ввержен был еси Михаиле боголюбче,/ уподобился еси древним страдальцем./ Страдалец новый за Христа быв земли Российския.
Не в горах и вертепех, не в пропастех земных скрывался если Михаиле, новый мучениче,/ гонения от безбожных терпя./ Грады бо и веси страждущей земли Российской/ яко пропасти и пустыни вменяюще.
Слава: Другом своим письма списал еси страдальче,/ в них же веру православную уяснил еси./ Имиже многия на пути правем от соблазн и преткновений сберегл еси,/ Михаиле мучениче Христов преславне.
Богородичен: Дева Пречистая, Христа, Младенца рождши,/ во Египте изгнание Иродово претерпе,/ темже, страдания испытавши,/ может и нам, бедствующым, помощи.
Кондак, глас 3:
Верный сын Церкве Христовы явился еси,/ новомучениче Михаиле славне,/ православие истинное верным возвещая/ и лесть церкве лукавнующих отгоняя,/ венец мученический от руки Человеколюбца приим/ на Небесех ныне горния славы наслаждаешися// моли спастися душам нашим.
Икос:
Что тя наречем, доблий мучениче Михаиле:/ изгнанника, яко дома и сродников лишился еси?/ Узника, яко темничныя узы претерпел еси?/ Учителя, яко ближним свет истинныя веры во тьме явил еси?/ Исповедника, яко Христа и Церкве истинныя даже до смерти не отверглся еси?/ Страдальца, яко муки испытал еси?/ Ныне же, престолу Божию предстоя,/ сродники твоя в Православней вере утверждай/ и молися о душах наших.
Ирмос: Превозносимый отцев Господь,/ пламень угаси,/ отроки ороси,/ согласно поющыя:/ Боже, благословен еси.
Исповедник новый явился еси Михаиле славне,/ егда блаженному Максиму и Студиту Феодору поревновал еси,/ и Сергиево отступльство яко Иудин грех обличил еси.
Никакоже покоримся блуднице в ризах багряных,/ сице о предателех и отступницех новообновленческих вопиял еси Михаиле страдальче,/ со исповедники и мученики верными.
Егоже обрел еси, Егоже возлюбил еси, Егоже исповедал еси, Христа Жизнодавца святейшее имя труды твоими возславил еси. И в затворех темничных глад, хлад и злобу людскую терпяще, имене Божия призыванием всякую скорбь небоязненно презрел еси.
Слава: Со святителем Иосифом и исповедником пресвитером Феодором Петроградским/ злочестие Сергиево обличил еси Михаиле мужески./ Узы и смерть за Христа имея выну во очесех своих.
Богородичен: Есмы члены Сыну Твоему и Богу нашему Иисусу Христу, аще во исповедании святых отец пребываем и делом их ревнуем, в Церкви Духом Святым руководимы и благодатию спасаемы, по молитвам Твоим, о Мати Дево.
Ирмос: Тебе Вседетелю,/ в пещи отроцы всемирный лик сплетше, пояху:/ дела всякая, Господа пойте,/ и превозносите во вся веки.
Святых исповедников во единомыслии себе стяжал еси Михаиле блаженне:/ Иосифа Петрова града похвалу,/ Феодора Московския Даниловы обители славу,/ Алексия старца Зосимовскаго,/ купно же и Нектария Оптины пустыни украшение.
Яко гром пройде по земли Российстей,/ кровию мученическою обагренней, слово твое,/ с силою Духа Святаго бывшее, Михаиле страдальче,/ и многи православныя люди на путь исповедничества подвигшее.
Егда в заточении темничнем пребывал еси, мучениче, многи молитвы возносил еси за чада церковныя, яже от гонителей и лжебратий лютыя скорби терпящия. Ныне же небесным твоим предстательством вернии людие мудрости и мужеству научаются, во еже злокозненному князю мира сего противостати.
Слава: В темницу ввержен был еси за Слово Божие,/ Михаиле свидетелю Христов,/ и тамо не престал еси Слово Божие сеяти,/ дондеже венец мученический от Христа Бога восприял еси.
Богородичен: Зрящи Сына Твоего, Пречистая, в земли нашей поругаема безбожники,/ Церковь Российскую не оставила еси ходатайством Твоим, достойно взывающу:/ радуйся, Благодатная, Господь с Тобою.
Ирмос: Исаие, ликуй,/ Дева име во чреве,/ и роди Сына Еммануила,/ Бога же и Человека,/ Восток Имя Ему:/ Егоже, величающе, Деву ублажаем.
Не пропадоша труды твоя всуе Михаиле мучениче!/ Ниже туне подвизался еси!/ Ниже вотще кровь твою за Христа, яко свидетель истинный Его излиял еси!
Не престанет Церковь Христова Православная/ поминати тя Михаиле страдальче и учителю!/ Ниже забудет советы и писания твоя,/ дондеже приидет Христос Спаситель/ со ангелы святыми Своими во славе Своей!
Слава: В Невечернем Свете вечнаго Царствия Христова/ сподоби молитвами твоими и нам водворитися Михаиле мучениче!/ Идеже ты сияеши со всеми святыми Церкве Православныя – Невесты Христовы верныя.
Богородичен: О, Царице Многопетая!/ О, Владычице Державная!/ Не остави нас милостию Твоею,/ с новомученики Российскими Тя величающия.
Светилен:
Тьмы безбожия и лести лукавыя отвратився,/ страдания за Христа претерпел еси, достохвальне Михаиле,/ ныне же во светлостех святых с новомученики ликовствуя,/ моли спасти и просветити чада Церкве Истинныя.
Слава, и ныне, Богородичен:
Отжени тьму греховную душ наших/ и к свету заповедей Христовых направи, Путеводительнице истинная,/ да, покаянием очистившеся, гласы благодарственными Тя величаем.
На хвалитех стихиры, глас 5.
Радуйся, новомучениче прехвальне, Михаиле,/ истинный сыне Святыя Церкве,/ во всеоружие Христово облеченный/ и веры ради до крове подвизавыйся./ Ты, отступники лукавыя яве обличил еси:/ и верныя словом благодатным утвердил еси/ и кровию твоею слово твое запечатлел еси/ ныне же в радости Господа Иисуса пребываеши // Егоже моли спасти и просветити душы нашя.
Радуйся, страдальче изрядный, Михаиле,/ истинный Христов подобниче,/ Крест Господень на рамо приемый,/ и в годину гонений лютых на Церковь истинную пострадавый./ Ты бо, уз и смерти не убоявся,/ лишения и гонения нивочтоже вменил еси/ и смерть яко приобретение жизни вечныя со Христом/ достойно и радостно сретил еси.// Егоже моли спасти и просветити душы нашя.
Радуйся, мучениче достохвальне, Михаиле,/ кровьми страдальческими обагренный,/ присный о нас предстателю/ и теплый к Богу молитвенниче./ Ты, ныне престолу Божию предстоя,/ с лики новомученик и исповедник Российских/ о земнем Отечестве твоем ходатайствуеши/ и Христу песнь благодарственную приносиши.// Егоже моли спасти и просветити душы нашя.
О преславне мучениче!/ Церкве истинныя Христовы украшение!/ Прелести обличителю и истины проповедниче!/ Страдальче и исповедниче Христов!/ Михаиле славнее!/ Не всуе твоя страдания понесл еси./ Не туне позвизался еси./ Но якоже семя Церкве истинныя бысть кровь твоя./ И прозябе земля наша люди православныя./ Подвиги твоя чтущия и труды лобызающия./ О них же моли непрестанно Христа.// Управити их во дни последняя в Царство Небесное.
Слава, глас 8:
Славою и честию нетленною/ венча Господь многострадальную твою главу,/ яко посреде безбожных гонений и отступльства лукаваго,/ дал еси славу хвале Его,/ мучениче добропобедне Михаиле,// Церкве Российския удобрение.
И ныне, Богородичен, глас тойже.
Срадуются с нами умная вся Чиноначалия,/ лик духовный совокупльше,/ видяще Царицу и Владычицу всех,/ многоименне верными славиму,/ радуются же и дуси праведных,/ сущии зрителие видения,/ на воздусе Свои руце молебно простирающу,/ просящу умирения миру// и спасения душам нашым.
Славословие великое и отпуст.
На Литургии
Блаженна от канона, песни 3-я и 6-я.
Прокимен, глас 4: Аще пойду посреде сени смертныя, не убоюся зла, яко Ты со мною еси.
Стих: Господь пасет мя и ничтоже мя лишит. Апостол к Тимофею, зачало 292 (2 Тим. 2, 1-10).
Аллилуиа, глас 6: Живый в помощи Вышняго, в крове Бога Небеснаго водворится. Стих: Речет Господеви: Заступник мой еси и Прибежище мое, Бог мой и уповаю на Него.
Евангелие от Иоанна, зачало 52 (Ин. 15, 17-27).
Причастен: В память вечную будет праведник: